Б.Онончимэг:Материал сонголт, дизайнерын авьяас хоёрын төгс хослол бол “Princess Mongolian fashion”-ий давуу тал

 “Princess Mongolian fashion”  брэндийн үүсгэн байгуулагч Б.Онончимэгтэй ярилцлаа.

-“Princess Mongolian fashion”  брэнд бүсгүйчүүдийн таашаалд нийцэж, сэтгэлд хүрдэг нь сошиалаас нэлээд ажиглагддаг. Энэ хүртэл танай брэндийн онцлог юу гэж хардаг вэ?

-“Princess Mongolian fashion” брэндийн хувьд монгол охид, бүсгүйчүүдийнхээ биеийн галбир, онцлогт тохируулаад яг өөрсдийнх нь биед сууж өгсөн хувцас үйлдвэрлэдгээрээ давуу талтай. Өөрөөр хэлбэл, гаднаас орж ирдэг хувцсыг бодвол монголчуудынхаа биеийн онцлогт тохирсон хувцас зориулж урладгаараа онцлог гэж хэлж болно. Мөн хамгийн их мэдрэмж гаргаж материал сонгодог учраас охид, бүсгүйчүүдийн хувьд нэлээд сэтгэл хангалуун байдаг. Дээр нь хөвсгөр бүсгүйчүүдийг 10 кг-аар багасгаж харагдуулах цаашлаад манайхыг зориод ирсэн бүсгүйчүүдэд ямар хувцас илүү зохихыг чин сэтгэлээсээ зөвлөж үйлчилдгээрээ онцлогтой.

-Анх лайв үзээд өөрийг чинь модель нь гэж боддог байлаа. Гэхдээ брэндийн үүсгэн байгуулагч гэдгийг мэдээд их гайхсан шүү. Ер нь загвар өмсдөг байв уу?

 -Миний хувьд загвар өмсдөггүй ч багаасаа урлаг, уран сайхан, хамтлаг дуу гээд зөндөө явж байсан учраас өөрийн гэсэн мэдрэмжтэй. Мэдээж дизайнер хүнд байх ёстой мэдрэмжийг өөртөө хангалттай хөгжүүлсэн гэж боддог. Тийм учраас загвар үзүүлэх, лайвын өмнө өнцгөө зөв олж, бусдад хувцасныхаа давуу тал болон онцлогийг зөв талаас нь харуулах чадвартай болсон гэж бодож байна. Тиймээс загвар өмсөгч байсан гэх сэтгэгдэл төрүүлсэн байж магадгүй. 2016 онд анх 5000 төгрөгөөр материал авч, брэндээ анх үүсгэн байгуулсан түүхтэй. Анх ганцаараа үйл ажиллагаа явуулж байгаад өдий хүртэл брэнд болгоод амжилттай хөгжүүлж явна. Одоо бол “Наян шаргын хийморь” ХХК, “Princess Mongolian fashion” брэндийг ээж Амаржаргал, дүү Отгончимэг нартайгаа хамтран хөгжүүлж байна. Манай гүйцэтгэх захирал дизайнер Б.Маралмаа гэж авьяаслаг бүсгүй ажилладаг бол дизайнер Б.Уянга, загвар зохион бүтээгчид Б.Од, Ж.Отгонсүрэн, Н.Золжаргал, Г.Цэдэвбалам, Н. Жамъянханд гээд мундаг хамт олонтойгоор үйл ажиллагаа явуулдаг.

-Лайваа ч өөрөө хийгээд, моделио ч өөрөө хийгээд олон нийтэд өөрийнхөө брэндийг таниулна гэдэг бас л амаргүй байсан байх. Энэ талаар?

-Лайв, моделио өөрөө хийгээд олон нийтэд өөрийн брэндийг таниулах нь миний онцлог давуу тал гэж хэлж болох юм. Үүнд би ээждээ баярлалаа гэж хэлье. Яагаад гэвэл, өөрийн мэдрэмжийг зургаа дахь мэдрэхүйтэйгээ хослуулсан, миний ээж бас ч гэж өөрийнхөө хэмжээнд авьяастай, мэдрэмжтэй, цаашлаад бие галбирын хувьд зөв, гуалиг байх боломжийг би ээжээсээ олж төрсөн гэж боддог. Мэдээж бүтээгдэхүүн танилцуулах лайв, моделио хийгээд, хувцсаа оёод, брэндээ бусдад ярилцаж таниулна гэдэг амаргүй. Анх лайв хийж байснаа бодох юм бол удах тусмаа илүү их гоё дэлгэрэнгүй танилцуулдаг, илүү олон нийтэд нээлттэй болдог юм билээ. Мөн олон загвар зохион бүтээгч охидынхоо тусламжтайгаар илүү их өргөжин тэлж байгаадаа баяртай байна.

-Кашмер өөрөө үнэтэй материал ч гэсэн танай пальтонууд харьцангуй хямд байдаг л даа. Үйлдвэрлэгч хүний хувьд бүтээгдэхүүний зах зээлийн үнийг хэрхэн барьж байгаа нууцаа хуваалцаач?

-Кашмер материал дотроо монгол цэвэр ямааны ноолуур, ноос агуулсан үйлдвэрийн аргаар боловсруулсан кашмер гэж 2-3 төрөл байдаг. Манай брэндийн хувьд бүх л төрлөөр нь хийдэг. 100 хувийн цэвэр монгол ямааны ноолуур, дээр нь солонгос үйлдвэрийн кашмераар ч хийнэ. Манайх үндэсний үйлдвэрлэгч учраас сэтгэл зүрхээ шингээж үйлдвэрлэдэг ч гэсэн хамгийн бодит, боломжийн, байж болох доод үнийг барьж ажилладаг. Энэ нь үйлчлүүлэгч нараа бодсон дээр нь хямралыг хамтдаа даван туулахгэсэн уриатай ажиллаж байна. Пальто, кашмер материалтай хувцас, европ даашинзууд ч тэр хамгийн байж болох боломжийн үнэтэй. Дээр нь манайх боломж бололцоогоороо маш сайн хямдруулдаг. Үнийн боломжит хязгаарт барих нууц гэвэл, тухайн хувцасны оёдлын технологитой хамааралтай. Тодруулбал, технологийн хувьд хугацаа багатай байвал тухайн хувцас харьцангуй хямд үнээр худалдаалагдах боломжтой. Ер нь хувцас үйлдвэрлэхэд хугацаа маш чухал, нэг хүн өдөрт нэг пальто оёх, 10 пальто оёх гэдэг шал өөр. Тиймээс тухайн хувцасны загвар, загвар зохион бүтээгчид болон дизайнер маань ямар загвар гаргасан бэ, тэр загварыг оёход ямар технологийг ашиглаж оёж байна вэ гэдгээсээ хамаараад үнийн өсөлт болон бууралтыг тодорхойлох боломжтой.

-Үндэсний үйлдвэрлэгчдээ дэмжих гэхээр заримдаа хэтэрхий үнэтэй байх тал бий. Гэсэн ч танай үнийн бодлого хэрэглэгч олонтой болоход нөлөөлсөн гэж бодож байна уу?

-Чанартай, хямд бүтээгдэхүүнийг олох нь ямар ч үйлчлүүлэгчийн зорилго болон сонголт байж болно. Өөрөөр хэлбэл, чанаргүй бүтээгдэхүүнийг үнэтэй худалдаж авах биш чанартай бүтээгдэхүүнийг хямдхан худалдаж авах нь ямар ч хэрэглэгчийн зорилго, зорилт гэж би хэлнэ. Тийм учраас манай бүтээгдэхүүнүүд материалын хувьд аль болох чанартайгаас гадна 4-5 давхар утсаар илүү сайн бэхэлгээтэй оёдог. Угаалт, эдэлгээ сайн даадгаараа онцлог давуу талтайгаас гадна биед тухтай. Мөн дээр нь суналттай материалтай учраас биеийн хөдөлгөөн, тав тухыг алдагдуулахгүй. Үнийн тал дээр хамгийн боломжийн байдаг гэдгийг түрүүнд дурдсан шүү дээ. Мэдээж энэ хоёрыг хослуулаад ирэхээр үйлчлүүлэгчийн тоо олон болоход хангалттай нэмэртэй гэж бодож байна.

-Хоёр ч удаа загварын шоугаа амжилттай зохион байгуулсныг нь мэднэ. Ер нь цаашид өөрийн нэрийн шоугаа уламжлал болгоод явах бодолтой юу?

-“Floraison fashion show” шинэ жилийн гоёлын даашинзны Монголын хамгийн том шоу гэдгээрээ жил бүр уламжлал болгон зохион байгуулагдах юм. “Floraison fashion show”-гаа жил бүрийн 11 дүгээр сарын 20-30-ны хооронд зохион байгуулахаар төлөвлөж байна. Анхны шоугаа амжилттай зохион байгуулсан. Хэвлэл мэдээллээр маш их цацагдаж, хүн бүрийн чихэнд хүрсэн байсан. Дараа дараагийн шоу маань илүү гоё болох байх гэж найдаж байна. Floraison гэдэг нь үндэслэх, дэлбээлэх гэсэн франц үгнээс гаралтай ийм гоё үгийг сонгон нэрлэж, энэ шоуг зохион байгуулахаар болсон нь бидний бас нэгэн бахархал.

-Шинэ жилээр заавал гоёлын даашинз гэхээсээ танай outfit-ууд нэлээд бүсгүйчүүдийн гоёлыг тодорхойлсон. Ер нь загварынхаа санааг хэрхэн гаргаж байна аа?

-Тийм шүү. Манай шүрэн, металл, мөрөн дээрээ илүү их чимэглэлтэй гоёлын пиджак худалдаанд нэлээд гарсан. Олон газрын захирлууд, бүсгүйчүүд их сэтгэл хангалуун хүлээж авч, загваруудаар маань шинэ гоёж, тренд болсон. Урлаг, уран сайханчид маань ч бас энэ пиджакуудаар маань гоёсонд маш их баяртай байна. Энэ ярилцлагын уншиж байгаа манай пиджакаар гоёсон, шинэ жилдээ өмссөн, дараа нь ч гэсэн арга хэмжээнд өмссөж байдаг хөөрхөнүүддээ баярлалаа гэж хэлье. Гоёлын пиджак нөмөрч арга хэмжээнд оролцох нь энэ жилийн их шинэлэг санаа байсан.Тайлаад коктеил даашинзтайгаа хослуулж болно. Энэ жилийн хувьд гоёлын даашинз гэхээсээ илүүтэй коктеил даашинз, гоёлын пиджактай байх нь олон бүсгүйн санаа сэтгэлд илүү их нийцэж, таалагдсан шүү.

-Танай загварууд гаднаасаа туранхай бүсгүйчүүдэд зориулсан юм шиг харагддаг хэрнээ ямар ч эмэгтэйд гоё зохиж, өө сэвийг нь далдлаад байдаг. Энэ магадгүй дизайнерын нууц авьяас, ноу хау юу?

-Нэгдүгээрт, материалын сонголт маш чухал. Материалаа хүний биеийн поропорц, жин, хэлбэрийг зөв харагдуулах, материалынхаа онцлогийг загвартайгаа зөв уялдуулах нь загвараа бүтээх нэршил юм л даа. Тэгэхээр ноу хау гэхээс илүүтэй материалын сонголтыг дизайнерын авьяастай хослуулаад гаргасан нь бүсгүйчүүдийн таашаалд хүрч байна гэж хэлмээр байна. Бэлхүүс хэсгээрээ өө сэвгүй эмэгтэй хүн гэж байхгүй.Түүнийгээ нууж, илүү гоё хэсгээ харуулахыг бүсгүй хүн бүр л хүсдэг шүү дээ.Тиймээс манайх энэ тал дээр илүү их ажиллахыг зорьдог.Бага зэргийн давсагтай, бөөрний махтай гэх мэтчилэн ихэнх эмэгтэйчүүдийнхээ санаа сэтгэлд тохирсон загваруудыг гаргахад авьяас бас их шаардахын зэрэгцээ материал сонголт маш их нөлөөлдөг. Энэ хоёрыг маш сайн хослуулсан учраас бүсгүйчүүд маань дуртай байдаг болов уу.

-Нэрнийхээ хувьд ч тэр танай брэнд бүсгүй хүн бүрийн дотор байдаг гүнж байх тэр нэг нууцлаг хүслийг гүйцээж өгөх юмсан гэсэн сэтгэлээр хувь хүн нэг бүрт өөрт нь тохирсон хувцас хийж өгөх боломжтой болов уу?

-“Princess Mongolian fashion” хүн бүрт хүрч үйлчлэхийг хичээдэг. Массаар болон захиалгаар үйлчилдгээрээ давуу талтай. Бүсгүйчүүдэд таалагдсан загварыг олноор нь үйлдвэрлэж гаргадгаас гадна өөрийн гэсэн цор ганц загварыг өөртөө тохируулан захиалан хийлгэх боломжтой байдаг. Захиалгын хэсэг, массын хэсэг гээд манай загвар зохион бүтээгчид хуваагдаж ангилагдаж ажилладаг гэсэн үг л дээ. Тодруулбал, загвар зохион бүтээгчид маань тухайн үйлчлүүлэгчид тохирсон загварыг зориулж гаргах боломжтой. Дээр нь бэлнээр сонголтоор худалдаалагдах боломжтой гэсэн хоёр нөхцөлтэйгөөр худалдаанд гардаг.

-Танай брэндийн хамгийн их олны таашаалд хүрч, дахин дахин захиалгад орж байгаа загвар юу байдаг бол. Учир нь дууссан загваруудаас цөөн тооны урьдчилсан захиалга авч байгаа талаар мэдээлэл гарсан байдаг л даа?

–Олны таашаалд хамгийн их хүрч чадсан хувцас гэвэл манай өмд бий. Энэ өмд үнэхээр брэнд, тренд болж чадсан Өндөр суудалтай, бэлхүүс барьж даруулга болж өгөхөөс гадна халаастай, халаасгүй буюу биеийн өө сэвийг маш гоё дарж, өндөр харагдуулдаг, биед маш их тухтай, сайн чанарын материал ашигладаг учраас өө сэвгүй, цэвэрхэн өмсгөлтэйгөөрөө онцлогтой. Энэ өмдний өмсгөлийг  төгс болгохын тулд бүтэн нэг сар ажилласан. Тэгж байж өдий зургаан жил зарагдаж байна. Цаашид зарагдсаар ч байх болно. Манай байнгын худалдаанд байдаг, эрэлт хэрэгцээ маш ихтэй брэнд загвар. Сүүлийн үед материалын сонголт бага зэрэг хязгаарлагдмал, хомсдолын байдалтай байгаа нь жаахан бэрхшээлтэй болсон. Хил гаалийн асуудлаас болоод сайн чанарын материал орж ирэхгүй байгаагаас болоод жаахан хомсдол үүсч байна. Түүнээс биш манайх өмднийхөө үйлдвэрлэх хүчин чадлыг хангалттай байлгаж чаддаг. Өмд хэр олныг үйлдвэрлэнэ төдий чинээгээрээ зарагддаг. Муу материалаар манайх хийдэггүй учраас сайн чанарын материал захиад иртэл нь хүлээгээд тэр болтол цөөн тооны урьдчилсан захиалга авах зэргээр ер нь л эрэлт маш ихтэй.

-“Princess Mongolian fashion”  брэндийн хэтийн төлөвийг та хэрхэн харж, цаашдын зорилгоо яаж тодорхойлсныг нь сонирхмоор байна?

-Монголынхоо бүх эмэгтэйчүүдэд хүрч үйлчлэх зорилготой ажиллаж байна. Монголын маань бүх сайхан эмэгтэйчүүд “Princess Mongolian fashion” үндэсний брэндээр сэтгэл хангалуун гоёж, өөртөө итгэлтэй сэтгэл дүү рэн алхаасай гэж боддог. Мэдээж энэ зорилгодоо хүрэхийн тулд бид чанартай ажиллах ёстой. Чанартай ажиллаж байж илүү олон үйлчлүүлэгч нарынхаа сэтгэлийг хангалуун байлгах юм. Энэ нь цаашдаа илүү өргөжин тэлэх, хүрээгээ томруулах, үйлчлүүлэгчдээ нэмэх үндэслэл болно.

-Уншигч бүсгүйчүүдэд маань дизайнер хүний хувьд хувцас сонголтын зөвлөгөө өгвөл?

-Бүсгүйчүүддээ өөртөө итгэлтэй байгаарай гэж захимаар байна. Миний хувьд, та өөртөө таалагдсан хувцсаа л өмс гэж зөвлөдөг. Өөртөө таалагдсан хувцсаа өмсөөд, сэтгэл хангалуун, нүдний шилээ зүүгээд, өсгийтэй гутлаа углаад, үсээ ороогоод явахад таны сэтгэл үнэхээр хангалуун байж чадна. Хэн нэгний үгээр биш өөрөө өөрийнхөө мэдрэмжээр, өөрийнхөө таалагдсан хувцсаа сонгож өмсөхийг бүсгүйчүүддээ зөвлөдөг. Энэ бол эмэгтэй хүн бүрт байх ёстой мэдрэмж. Ямар ч эмэгтэй хүн өөртөө зохих хувцсыг мэдэрч чаддаг байх ёстой. Хүний үгээр сонголт хийж өөрийгөө битгий хувцаслаарай гэж зөвлөмөөр байна. Өөрөөр хэлбэл, өөрийнхөө биед юу зохихыг ямар ч эмэгтэй хүн мэддэг байх ёстой. Тийм учраас зөвлөгөөгөөр биш өөрөө өөртөө илүү гоё тохирох хувцсыг өмсөж үзэж байгаад сонголтоо хийж байгаарай. Хэрвээ хүсвэл манайхыг зориод ирээрэй, бид энэ тал дээр мэргэжлийн зөвлөгөө өгч болно. Зарим эмэгтэйчүүд юу өмсөхөө ерөөсөө мэддэггүй гэх нь бий. Магадгүй танд ийм асуудал байгаа бол манайхыг зорьж ирээд мэргэжлийн зөвлөгөө асууж болно. “Би нэг ийм биетэй шүү, иймэрхүү хувцас надад зохидог шүү”  гэсэн мэдрэмж хүн бүрт өөр өөрсдөд нь байдаг. Тийм учраас өөрийнхөө энэ мэдрэмжийг хөгжүүлээд өөртөө итгэлтэйгээр алхаарай, та бол энэ хорвоогийн чимэг юм шүү гэж хэлмээр байна.

-Ярилцсанд баярлалаа. Ажилд нь амжилт хүсье.